Sarà che ò passà più tempo a scaldar la panca che no a pestar l'erba del campo, che ve conto 'sta storia che l'è capità in un paese del veneto, domenega passa', poco distante da casa mia.

Stava par scominsiar la partia, l'arbitro gavea ciama' i zugadori, ma capita 'na storia nova. Mentre i buteleti de riserva dela squadra de casa i se comoda in campo, staltri i resta dentro dove i se cambia. No i vol entrar in campo e sentarse su la panchina. El Mister el core subito par capir 'ssa capita.

" 'ssa ela sta storia?...che novità saria?:...

" Mister, el dise uno dei buteleti, ancò no zughemo, no entremo en campo..."

El Mister, nol crede a le so recie e scominsia a sigar come un mato.

" e parchè mai, gavio tuti mal de pansa?..."

" parchè Mister, no zughemo mai, in campo sempre i stessi e gnanca quando se vinse comodi no entremo..."

" ma chi credio d'essar, dentro in campo tuti, senò, no zughè più par tuta la vostra vita..."

'Na mama dei buteleti, sindacalista de sinistra col fiol ch'el zugava a l'ala destra ( de riserva) che l'ascoltava da fora, capisse la situasion e mete el naso e la lengua (longa assè) anca ela.

" el me scusa mister, parchè i no zugherà più?..."

" parchè i no vol 'ndar in panca..."

"qual'elo el problema, mister? tanto i zuga sempre e solo i soliti undese e no te li cambi mai, gnanca quando te vinsi 8 a 0 opure quando te li cambi te li fe zugar sinque minuti e poi te li tiri fora par far entrar n'altro panchinar. Mister, chi credito d'esar, Murigno?"...

" siora, la me scusa, ma 'stoqua' l'è un sciopero de la panchina, alora?..."

" bravo Mister, te gh'è capio tuto al volo, l'è proprio un sciopero, gavarà dirito anca la panchina a farlo, o no?"

El Mister nol savea più 'ssa far " ciamè el Presidente, ancò par fortuna l'è in tribuna..."

El Presidente 'riva subito, vien informà del fato, parla prima col Mister e dopo co la mama del buteleto ch'el zugava (mai) a l'ala destra.

" siora, saria mejo par tuti che i buteleti i entresse..."

" mejo par tuti?'ssa ela, na minaccia?  ma chi credelo d'esar anca lu, el Presidente Toir che nol gh'è mai, ma s'alo informa' 'ssa el fa 'sto sior, el Mister? posibile che i no possa zugar tuti un fià, magari quando vinsemo senza tanti problemi?... sta 'tento,  Presidente, la panchina l'è un patrimonio tecnico, de la squadra, se i no zuga, i se impoverisse, i no ga più voja de venir solo par alenarse e basta. Alo capio Presidente? La panchina l'è un patrimonio de la società,  la panchina poco o tanto la deve zugar, senza la panca no se vinse niente, el Presidente deve meterghe el  becco quando gh'è 'sti problemi. Buteleti, vestive, 'ndemo in tribuna a vardar la partia, se vede mejo che no a star in panchina.Tanto iè in undese, i basta"

El Presidente varda el Mister " Stà 'tento, dovemo salvar el campionato, la squadra, la panchina e anca el Mister, 'desso pensaghe ti..."

Panchinari a disposizione perenne, giovanissimi, allievi e juniores, unitevi.                                                     Se avete un problema di questo tipo, scrivete a zugo.mai@libero.it  Rispondo a tutti, pubblico le vostre mail, senza riferimenti precisi a persone. Dite solo cosa è successo in panchina, la vostra categoria e di quale provincia siete. Non fate nomi, grazie.

Rudi